MARTINA IORI E VINÇ IL LIET INTERNATIONAL 2014 pdf

Udin, ai 17 di Dicembar dal 2014
MARTINA IORI E VINÇ IL LIET INTERNATIONAL 2014.
E va sul podi adun cui Forefingers Up!, dopo il sucès di Suns.
Grancj apontaments di nivel internazionâl in cheste fin 2014 pe musiche in lenghe di
minorance. Un mês indaûr a Udin, intun Teatri Palamostre dut plen, si è davuelte la XI
edizion di Suns, il festival de cjançon in lenghe minoritarie organizât de Cooperative
Informazion Furlane cul supuart de ARLeF e dal Comun di Udin, risiervât aes minorancis
talianis e dai paîs de Europe dal sud (de France ae Cravuazie). Pôcs dîs indaûr a
Oldenburg (Gjermanie) si è davuelt il Liet International, il plui impuartant festival
european pe musiche contemporanie in lenghe minoritarie, che di chel Suns al è une
des semifinâls.
Protagoniscj dal Liet International 2014 a son stâts, fûr di discussion, i vincidôrs di
Suns, Martina Iori e i Forefingers Up!. La zovine cjantautore ladine de Val di Fasse
Martina Iori, cu la cjançon “Via con mia musega”, daspò di vê “fat saltâ” Suns, e à inmagât
ancje la jurie internazionâl dal Liet International concuistant il prin puest; tierç puest invezit
pai sarts Forefingers Up!. Te localitât de Basse Sassonie, i finaliscj di Suns si son “sfidâts”
cun altris vot grup rivâts di dute Europe, espressions di ancjetantis minorancis linguistichis.
«Cheste vitorie e il tierç puest a son la certificazion e la conferme de grande cualitât di
Suns e des sôs sieltis artistichis – al marche il president de ARLeF, Lorenzo Fabbro -. Di
fat, ancje tes edizions passadis dal Liet International, i finaliscj vincidôrs di Suns a àn
simpri vuadagnât il podi (Dr. Dreer & CRC Posse, Lino Starulino, Resistence in Dub,
Stéphane Casalta, Coffeeshock Company…)».
Alt il nivel e la professionalitât di Martina Iori e dai Forefingers Up!, une vore plui alt rispiet
a chel di chês altris propuestis. I cinc fantats sarts a àn scjaldât il public cu la grande
energjie dal lôr toc hip hop “Sa luxi ‘e su soli”. Martina e à emozionât ducj cu l sô vôs
frescje compagnade de chitare e supuartade di doi grancj musiciscj: Enrico Tommasini ae
batarie e il furlan Mirco Tondon al liron.
Nassût in Frisie tal 2002, il Liet International al ven organizât ogni an di une minorance
divierse, in gracie de colaborazion jenfri cetancj partner europeans e cul contribût de
Segretarie Gjenerâl dal Consei di Europe.

Download Report