Ka Puʻu o Nā Iwi Kūpuna
Ma kēia puʻu i kanu hou ʻia ai nā iwi o nā kūpuna i huli ʻia ma ka hoʻoponopono a
ka hoʻonui ʻana i nā ala pīpā a ke alanui ʻo Kalākaua. Aia ma kahi o 300 mau iwi paʻa o
nā kānaka i kanu hou ʻia ma ia puʻu. No kona ʻano laʻa, ʻaʻole hoʻolaha ʻia ke kumu e kū
ana ia puʻu ma Waikīkī lā. Wahi a ka hui nona ke kuleana e mālama ai i nā iwi, pēlā ko
lākou makemake i ʻole e mahaʻoi ai nā malihini i ia ʻāina.
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
Ke Kiʻi o Duke Kahanamoku
Copyright © Kathleen Walling Fry
No Duke Paoa Kahanamoku
Duke Paoa Kahinu Mokoe Hulikohola Kahanamoku
Hānau ʻia: 24 ʻAukake 1890 – Hala: 22 Ianuali 1968
No Waikīkī, Oʻahu mai ʻo Duke Kahanamoku.
Hānau ʻia nō ʻo ia ma ka hale aliʻi ʻo Haleakalā, ka hale o
Bernice Pauahi ma Honolulu i ka lā 24 o ʻAukake 1890.
He mau kahu kona mau mākua ma nā hale aliʻi. I kona
wā kamaliʻi ʻo ia i noho ai me kona mau kūpuna ma
Kealia. Nui kona manawa ma kahakai o Waikīkī; he
kamaʻāina maoli nō ʻo ia o ia wahi.
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
Ua kaulana ʻo Duke Kahanamoku i kona
lanakila ʻana i ka medala kula no ka ʻauʻau ʻana ma ka
hoʻokūkū ʻo Olympics. Ua loaʻa kekahi mau medala iā
iā i nā makahiki 1912, 1920 a 1924. Ma muli o Duke,
maopopo aʻela ka honua holoʻokoʻa i ka loea o nā
Hawaiʻi i ke kai. I ka lā 22 o Ianuali 1968, ua hala ʻo
ia.
ʻAʻole i hoʻohanohano ʻia kona inoa e ka poʻe
ʻAmelika e like me ka nui e pono ai a i ka makahiki
1984, i ko ke Kōmite Olympic o ʻAmelika ʻae ʻana i
kona inoa ma ka Hale Kaulana Loa.
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
Nā Pōhaku Ola
No Moaulanuiakea ma Kahiki mai nā kāhuna ʻehā i ka wā ma mua o Kakuhihewa. ʻO
Kapaemahu, Kapuni, Kahāloa, a Kinohi nā inoa o ia mau kāhuna. ʻO ka
hōʻola ʻana i ke kanaka ko lākou mana.
Wahi a ka moʻolelo, ma Kaimukī i kālai ʻia ai nā pōhaku a kauō ʻia i Ulukou ma Waikīkī
ma ka pō Kāne e nā kānaka he lehulehu. Na Kapaemahu i kuhikuhi i kahi i waiho ai nā pōhaku.
Ma mua o ko lākou haʻalele ʻana iā Hawaiʻi no Kahiki, ua hoʻolaʻa ʻia nā pōhaku e nā kāhuna.
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
Ke Kiʻi o Kaʻiulani
© Kathleen Walling Fry
ʻO Archibald Cleghorn ke kāne, ʻo Mariam Likelike ka wahine. Noho pū lāua a
hānau ʻia ʻo Victoria Kawēkiu Kaʻiulani Lunalilo Kalaninuiahilapalapa Cleghorn, he
wahine. Ma ka lā 16 o ka mahina ʻo ʻOkakopa i ka makahiki 1875 i hānau ʻia ai ʻo
Kaʻiulani. Hoʻokula ʻia ʻo Kaʻiulani ma Enelani a hoʻi hou mai ʻo ia i Hawaiʻi ma hope o
ka hoʻokāhuli ʻia ʻana o ke Aupuni Mōʻī. A lilo ke aupuni ma lalo o ke aupuni kūikawā.
Hala ʻo Kaʻiulani i ka lā 6 o Malaki i ka makahiki 1899. He 23 ona makahiki i kona hala
ʻana.
ʻO ʻĀinahau kona home ma Waikīkī.
Na Ruth Keʻelikōlani i makana aku i ka
ʻāina a ka hale ʻo 'Āinahau iā Kaʻiulani. He
ʻumi ʻeka ka nui o ka ʻāina o ʻĀinahau. ʻIke
ʻia ma ke kiʻi i ka hānai ʻana o Kaʻiulani i ka
manu pīkake. Ua nui wale nā manu
pīkake ma ʻĀinahau. Ua haku ʻia ke mele
ʻo Āinahau na Miram Likelike Cleghorn.
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
ʻĀinahau
na Princess Miriam Likelike
Na ka wai lūkini
Wai anuhea o ka rose
E hoʻopē nei i ka liko o nā pua
Na ka manu pīkake
Manu hulu melemele
Nā kāhiko ia o kuʻu home
Hui:
Nani wale kuʻu home
ʻO ʻĀinahau i ka ʻiu
I ka holu nape
A ka lau o ka niu
I ka uluwehiwehi
I ke ʻala o nā pua
Kuʻu home, kuʻu home i ka ʻiuʻiu
Na ka makani aheahe
I pā mai ma kai
I lawe mai i ke
Onaona līpoa
E hoʻonipo hoʻonipo
Me ke ʻala o kuʻu home
Kuʻu home, kuʻu home i ka ʻiuʻiu
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala
Royal Hawaiian Hotel
Na Mary Pulaʻa Robins
Uluwehiwehi ʻoe i kaʻu ʻike la
E ka Royal Hawaiian Hotel
A he nani la ke hulali nei
A he nani maoli nō
Ka moena weleweka moe kāua la
He pakika he paheʻe maikaʻi nei
A he nani la ke hulali nei
A he nani maoli nō
Ka paia māpala ʻōmaʻomaʻo la
He pipiʻo mau e ke ānuenue
A he nani la ke hulali nei
A he nani maoli nō
ʻO ka hone a ke kai i ka puʻu one la
Me ke ʻala līpoa e moani nei
A he nani la ke hulali nei
A he nani maoli nō
ʻO ka holunape a ka lau o ka niu la
I ke kulukulu aumoe
A he nani la ke hulali nei
A he nani maoli nō
Ka Hōkū-loa nō kou alakaʻi la
ʻO ka mana Kāhikolu kou home la
A he nani la ke hulali nei
A he nani maoli nō
E ō e ka Royal Hawaiian Hotel
Kou inoa hanohano ia la
A he nani la ke hulali nei
A he nani maoli nō
Kikokiko ʻia na Kalae Akioka me Mālia Melemai
Mei 2016
Na ke kula ʻo Pūʻōhala