1
Kivua,
Nai Talatala Qase
Nai Talatala ni Tabacakacaka
Nai Liuliu ni Veitokani ni Marama
I’saka:
Sa vakabula tale tiko yani ena Yaca talei i Jisu Karisito, na Noda i Vakabula.
Na parokaramu ni yabaki oqo eratou vakaraitaka na marama e lewe ono ka ratou a tiko ena
neimami sota na marama Lotu Wesele e vuravura ka a vakayacori mai Houston, Texas. Na
ulutaga ka qaravi mai ke y a e tautauvata ga kei na ulutaga ka vakarautaki me baleta na
macawa ni Tina ena yabaki oqo, ka ratou vakauqeti na marama me ratou wasea kei keda na
veika eratou sa vulica rawa mai.
E sa na yabaki 70 tale ga na neimami soqosoqo ena yabaki mai oqo ka sa gadreva talega kina
me ra vakaitavi na marama ena nodra wasea na nodra vakabauta ena loma ni nodra dui
Valenilotu ena kena vakataucokotaki ni parokaramu vakarautaki ni yabaki oqo.
Esa vakau tiko yani na vei pepa oqo: 3 na Vuli Vola Tabu (Tusiti, Vukelulu kei na
Vakaraubuka)
:
E dua na sere ka salavata kei na ulutaga
:
E dua na drama Iekaleka sara me vakayagataki nib era nai Vunau ena lotu ena
Siga Levu
: Nai Vunau ka gadreva me ra vakataucokotaki ko ira na marama era Dauvunau
ni Veivalenilotu
:
Nai Vakamacala ni drama kei Tepora ena yakavi – sa kerei me ra dui
vakarautaka ga na nodra drama ka tiko ena Nodrai vola na Dauveilewai wase
4 & 5.
Me ra sa na qai dui vakarautaka ga na nodra parokaramu ni Siga Tabu.
Me rokovi ka dokai duadua ga na noda Kalou bula ena vuku ni parokaramu ka vakarautaki
oqo.
Ko,
Sala Naucabalavu (Deaconess)
VUNIVOLA
2
Vola Tabu:
Nai Matai ni Vuli Vola Tabu
2 Tui 22:-23:1-25 & 2 ni Veigauna 34:14-33
Na Parofita marama ko Uluda sa vakawati vei Salumo koya sa dauqarava na nai
sulu vakaTui I Josaia na Tui. Ena gauna era sa vakavouia kina na vale ni soro na sa
qai laurai kina e dua nai lavelave ni Vunau ka soli taumada vei Mosese nai Talatala
ni Kalou ka liutaka na veisereki mai na veivakabobulataki mai Ijipita. Sa tala eso na I
talai ko Josaia na Tui me ra laki vakataroga na Parofita marama oqo se cava sara
mada nai tukutuku ni Kalou ena vukuni veika sa basika oqo ena I vunau ka kune
oqo. E talei ni a sega ni tarogi rau na Parofita rogo levu ko Jeremaia kei Sefanaia ia a
vakasaqara na loma ni Kalou ena nona via rogoca na domo ni Parofita marama.
Nai tukutuku mai vua na marama e dua tani mai na veitukutuku eso ka dau rogo
voli mai veiira na Parofita ka ra gauna vata ka ni a vakadewataka sara na vosa ni
Kalou me vaka e volai ena I Vakarua. E vakadeitaka ko HUlda na yalayala I Jiova ni
na vakarusai ko Juta ena vuku ni nona talaidredre. E dina sara ni a veivakarerei na
veika e cavuta ena vukuni bula vakapolitiki, ia na nona parofisai na marama sa
veivakayavalati ni sa vakavuna e dua na veivakavoui ena bula I Josaia na Tui. A
yavala na Tui ko Josaia ka vakatekivu me liutaka e dua na toso kaukauwa me
vakarusai kece sara na qaravi kalou matakau ka ra vakalesui na lewe I Isireli ki vua
na nodra Kalou.
A vakaitavi sara na parofita marama oqo ena veisau levu kei na veivakabulai ni
vanu oqo. E talei ni na nona kacivi na Parofita marama oqo ka ni dusia e dua na dina
levu ni nodra nuitaki na marama ena buli vanua kei na bula yadua ni tamata kina
veitokani kei na Kalou. A vakaitavi na parofita marama oqo ena kena
vakamatatataki na lawa ni bula ni qaravi Kalou vua na Tui ka ni uto saraga ni nodra
na tamata ni Kalou na muri dodonu ni vunau se lawa.
Na dina ni tuktuku oqo sa vakadeitaka na nodra vakayagataki talega na marama ena
nona gadreva na kalou me vakatakila na lomana lei na nona lewa vei ira na tamata.
E vakadeitaka na nai tukutuku oqo ni sa daunivosa dina ni Kalou ko Uluda ka talei
talega ni vakatakila na parofita marama na nona yalodina ka yalo qaqa me kakua ni
loveca na vosa ni Kalou ia me cavuta taucoko me vaka e gadrevi vua mai vua na
Kalou.
E talei ni sega ni okata na I Vola Tabu na bibi ni nona marama na parofita ia sa
maroroya na dina ni saa dau vakayagataka talega na marama na Kalou ena cakacaka
ni nona veivakavoui kei na veivakabulai.Sa vakadeitaka na I talanoa oqo ni sa dau
vakayagataki ira talega na marama ena vakavoui nei Isireli ena gauna ni Tui ko
Josai. Sa vuni veisau ni Tui kei na vanua na vakadewai tukutuku ni Kalou me
talairawarawa na Tui kei na vanua kina vosa ni Kalou.
Na ulutaga me veivosakitaki
1.
E vakaevei ko sa bau vakayalia se sega ni vakayacora na Vosa ni Kalou ena
loma ni nomui lakolako vaka- lotu se vakabauta?
2.
Ko vakakila li ni sa dau vosa tiko vei iko na Kalou edaidai?
3.
E vu ni nona veisau na Tui ko Josia na kena kunei na iVola ni Lawa se Vunau,
ia mo ni vakasamataka mada ke mani sega nai Vola Tabu edaidai; na cava soti na
veisau ko rawa ni raica ena noda vale ni lotu, vei vale, koro ka rawa ni ko
vakaveiwekanitaka kei na kena sa bula tiko na vosa ni Kalou ena keda maliwa.
3
VULI VOLA TABU 2
Vola Tabu: Dauveilewai 4 -5
Na nodra i vola ni lawa na Jiuu e liu era laurai kina ni ra sega ni okati ka galala na
marama era bula donuya na gauna ko ya me vakataki keda ni kua. Na bula ni
veitikotiko ena gauna ko ya era dauvakaliuci ga kina na turaga ka rairai sakasaka
vakalevu na kena cadra cake mai e dua na marama enai tutu ni veiliutaki. Nai Vola
Tabu e vakadeitaka ni kaciva na Kalou nodra bula na marama eso me vakaitavitaki
ira ena nona vuravura ka namaka talega me ra vakaio kina se vakacava sara nai
tuvaki ni bula era donuya ena gauna ‘ya. Ko Tepora edua vei ira na marama oqo, ka
vakadonuya na watina ko Lapitoci me rogoca na Nona veikacivi kei na Nona veitalai
na Kalou. A veitokoni vakaukauwa sara vua ena gauna a kacivi kina ko Tepora me
cakacakataka na nodra vakagalalataki na Isireli mai vei Japini na tui Kenani, ni oti
vinaka e ruasagavulu na yabaki na nona vakalolomataka tu na nodra bula. E
veivakurabuitaki na nona digitaki Tepora na Kalou, me parofita ka dauniveilewai
talega, baleta ni marama. A qarava vakavinaka sara na nonai tavi ka vakavuna me ra
vakagalalataki kina na kai Isireli.
A kacivi Peraki ka vakaraitaka vua na Nonai tuvatuva na Kalou me baleta na nona
valuti ko Japini na tui. A vakatovolei sara ga na vakabauta nei Peraki ni sa
vakaraitaka vua ko Tepora na Nona vakataulewa na Kalou. E raica tu ni sega mada
ga na mataivalu me na sotavi ira na sotia qaqa ni Kenani ka vakatalega nai yaragi me
vakarusa na nodra qiqi ni valu kaukamea. E vakasamataka na dredre ko ya kei na
nona nuiqawaqawataka ni lako yani vei Tepora nai tukutuku ni valu – a vakavuna
me tukuna kina “ Kevaka ko na lakovata kei au, au na lako: ia kevaka ko na sega ni
lakovata kei au, au na sega ni lako.” E sega ni ka rawarawa toka na nodrau
veivosaki, baleta ko Tepora ni marama ni lewa ka tukuna vei Peraki na ka e dodonu
me vakayacora, ia, ko Peraki, baleta ni tagane, e via vakatarotaroga na lewa ni
yalewa. E yaco me rau lakovata ki nai valu ka veivuketaka na kena vakayacori ka
qaqa kina na nodrau mataivalu.
Ena Dauveilewai 5, e lagati kina na sere ni vakavinavinaka vua na Kalou ena vuku
ni qaqa ko ya ka tukuni talega kina e vica na dina ni kena vakayacori nai Valu
Vakayalo ena noda bula kei na vuravura eda sa tiko kina.
Me da tu vakarau me da valuvakayalo – Ena sega ni mana na veiliutaki
vakaivalu kevaka era sega ni vakarorogo na kena sotia. Ko sotia yalo qaqa ka dau
vakarorogo li?
Me da kila ni sa liu ena buturara ni i valu na Kalou – Na Kalou ena vukei
keda ena buturara ni veivaluvaluti kevaka eda vakararavi Vua ka vakayacora na
Lomana. Sa rawata na ka kecega, ko Koya.
Me da kua ni vakayalo malumalumutaki mai vei ira eso – Era a sega ni lako
kece ki nai valu na Isireli baleta ni eso era tamata tawa Vakabauta ka ravarava.
Na tamata qaqa era sa vu ni veivakararamataki – Ko Isireli a lakova edua na
gauna ni yaluma kei na butobuto,ia, ko Tepora, sa kauta mai e dua na mataka vou
vei ira. Ko iko beka edua na sotia ka rawa ni ko na ia na veivakararamataki ena noda
vuravura oqo?
4
VULI VOLA TABU 3
Tikina Vakarautaki: 1 Pita 2: 9 - 12
Au vakabauta ni matata vinaka vei kemuni na tikina vakarautaki ka sa wiliki vei keda
ena siga e daidai - na tikina ka sa wiliki e solia e dua na vakacegu vei keda na Lotu vaKarisito ena siga e daidai ena vuku ni noda vakabauta ia vei ira e liu ena gauna e sa qai
volai kina era sotava na veidredre eso - oqo na vosa ni veivakadeitaki. Vei ira na volai
taumada ki na vei ira na tikina oqo era a gadreva vakalevu sara eso na vosa ni
veivakayaloqaqataki kei na veivukei baleta na nodra sotava tiko na veidredre eso, ka
bolea tiko na nodra vakabauta. Ko ira na lewenilotu va-Karisito e Asia Minor/Vualiku
kei Turkey era a vakayaloqaqataki me ra taura matua ka me ra tubu tikoga ena nodra
vakabauta na Kalou ena gauna era sotava tiko kina na veivakararawataki me baleta na
nodra vakabauta. Ni da raica ni ko ira na Lotu va-Karisito taumada era bulataka na bula
ni tamata vulagi se tamata mai taudaku ena vuku ni nodra vakabauta. Na
veivakararawataki kei na veivakatotogani ni Matanitu e sa vakavuna me ra biu vanua na
muri Jisu taumada, ka ra vakatetea yani na itukutuku vinaka ena loma ni vanua vaka
Roma. E kaukauwa tale tikoga mai na nodra vakararawataki na lewenilotu va-Karisito
ena gauna ko ya ka matata vinaka ena ivola nei Pita ni ra sotava tiko eso na bolebole ena
vuku ni nodra vakabauta.
Na noda lesoni edaidai ka rawa ni raici tale ga ena Kosipeli, e vakaraitaki kina ni ra bula
vaka-vulagi na tamata Lotu va-Karisito ena gauna ko ya. Ko ira na ciqoma taumada ka
vakabauta na Kalou era okati me ra vulagi baleta na nodra dau veilomani ka era bolea
na mate ena vuku ni nodra vakaraitaka tiko ga, na nona bula e dua ni sa Vakabulai koya
na Karisito. Na nodra bula doudou era okata na veiliutaki me vakayavalata na nodra
vakatulewa ni bula raraba vaka-matanitu. I'a ko gauna ena dau yaco ga kina na
veiveisau. Na vakabauta ka a tauyavu me dua nai soqosoqo lailai e sa yaco me vakabauta
levu duadua e vuravura. E dua na kena vakaraitaki ni ko ira na veiliutaki ena
veimatanitu lelevu, era dau vakayagataka nai Vola Tabu me ra bubuluitaki kina ka ‘ra
vakararavi vakatabaki dua kina Kalou ena vuku ni nodra veiliutaki. Ena gauna ni
veiveisau oqo o keda na lewenilotu va-Karisito eda sa sega ni okati keda me da tiko
vakavulagi e vuravura ka sa sega sara ni dua me na okati keda me da vakakina.
Eda sa vakatakilakilataki, ka eda sa kacivi ka vakasulumi e na ivakarau ni bula vou ena
vuku i Karisito. Esa dodonu me da vakaraitaka yani ki vuravura na veika
veivakurabuitaki sa vakayacora vei keda na Kalou ni sa vakabulai keda mai na mate
vakayalo ka kauti keda ki na bula ni veilomani, yalololoma, yalovinaka kei na yalomalua.
Sai koya oqo na noda itukutuku ki vuravura taucoko.
VEIKA ME VEIVOSAKITAKI
Vakamacalataka e va na ibalebale ni veika e vakaraitaki toka ena tikina e 9 me baleta na
noda ‘dau tiko ena mata ni Kalou'.
5
Ulutaga:
" Ko sa kacivi mo tukuna na Nona Vinaka na Kalou"
Vola Tabu: 1Peter 2: 1-3,9-12. (E rawa talega ni ko vakayagataka na veitiki ni Vola
Tabu eso ka veiganiti kei na drama lekaleka oqo).
Matai ni Wasewase
Daunivakamacala: Era dau soli coffee vakamataka na lewe ni mataveitokani ena
Wasewase ko Suva ena veimataka ni Vakarauwai kei na Siga Tabu. Oqo na nodratou
veitalanoa na ilala mataveitokani oqo.
Dola na latilati.
[Me ratou kacikacivaki tiko na ilala oqo: “Yadra, dua na bilo coffee!” se “Free coffee”.]
Teu: Au sa via taroga mada, se cava tou vosota tiko kina na mai tu va qo i gaunisala? Ira
qo sega ni via kauwai madaga ni datou mai via vakani ira! Ke’u a kila ni da na mai duri tu
ga vaqo ke’u a se grog ga yani!
Tawake: Setiseti....e rua la na yaua na mai veivakani. Na gunu yaqona qori o rawa ni
sigataka na levu ni macamaca karisini dou dau cakava tiko!
(Me ra veidredrevaki na lewe ni soli coffee)
Tanya: Au sega ni kila na vu ni nomu muri tu mai, ia o au, au via bolea na noqu bula me’u
biuta na lagolago vinaka ni tikoga mai vale kei na noda la’ki lotu ga ena Siga Tabu....... oti
ga ya, da mai tu yani. Sega tale ni dua na ka da cakava tu me vakaukauwataki kina na
noda bula vakayalo.
Teu: Vakacava na vuli, na workshop ‘ra cakava tu qo? Au rogoca o Mereani sa levu
saraga na nona lai workshop tiko!
Mereani: Sa dau vosa la o iko Tawake! (me vakaraici Teu)
(Me ratou veidredrevaki na kena vo)
Talica: Teps, iko kila mada na i naki ni noda mai vagunutitaki ira tiko kina qo?
Teu: Sega saraga....(me kurekure na uluna) Au mai sara mateni sara tu ga!
Mereani: E levu ga vei ira na noda itokani ka ra dau lako curuma eso na dredre, era dau
sega ni taura rawa na kena bibi. Era sa dau nanuma me ra lako mai mateni tu i tauni me
rawa ni vaseavutaka tu na nodra leqa. Sa qai nodatou itavi o kedatou medatou
vakaraitaka vei ira oqo, ni da se kauwai tiko. Dina ga ni ra vaqara vakacegu mai tauni, o
kedatou talega tou se nanumi ira tiko, tou mai vakani ira ka vakananumi ira ni se kauwai
tiko na Kalou levu da qarava tiko qo.
Semesa: Ni ra sa vakani rawa ga, oti me ra sa vatalai saraga yani nodra dui vale me ra
kua ni moce tu vakaveitalia i tauni baleta de qai baci so era buturaki, so era na baci
butakoci na nodrai sulu kei na nodra i vava.
Teu: Oi....sa dina. Ae....e sa yaco sara tu ga ya??
Talica: Uuuuu...e dua keitou sotava, e vasapo sara tu ga mai. Ni butakoci na nona i vava
kei na nona i sulu taucoko.
6
[Me qai cavuta na Daunivakamacala ka me sogo kina na Skit 1.]
Daunivakamacala: 1 Joni 3: 18 “Oi kemudou na luvequ lomani, me da kakua ni loloma
e na vosa ga, se e na yameda; e na cakacaka ga kei na lomadina.”
Ai karua ni wasewase
Daunivakamacala: Eratou se duri tu ga na ilala soli coffee, sa ra ceba mai eso na
nodratou itokani ni oti mai na danisi kei na gunu.
Talica: Dou yadra, dua mada na bilo coffee! E free.
Mateni 1: Seti! Sega ni dua na ka e free i Suva ena gauna qo!
Mateni 2 (me vosa vei Mateni 1): Taciqu, au sa lala saraga na ketequ!
Mereani: Qo saraga dua memu bilo coffee! Dua talega kemu madrai?
Mateni 2: Isa taciqu, vinaka na veisotavi tiko. O au qo se vasigalevu sara na noa. Suka ga
na job sa veimurimuri tu mai na happy hour kei taciqu qo (me tarai Mateni 1). Qo au sa
na qai yaco bula saraga i neitou ni sa bau tawa toka na ketequ.
Mateni 1: Hahahaha....o sotavi lala tu mai vei?
(Rau gunu coffee vinaka, rau sa mani vakamoce ka rau sa gole sara tiko.)
Daunivakamacala: E sega ni dede na nodrau vakanadaku na veitokani ya sa ra tabili mai
na i lala levu ka sa suka mai na danisi. Sa 5 na kaloko ena mataka ka sa waqa mai na cina
ena veivalenidanisi ni sa gauna ni sogo. Era dau mai tao tu na ilala oqo ena Ivi Triangle
ena loma ni koroturaga e Suva me ra wawa motoka kei na gunu coffee.
E dua na cauravou e lako cuvacuva mai ka mani sureti sara me mai gunu coffee. E mai
talanoa toka kei Semesa, e dua vei iratou na dau soli coffee.
Cauravou: Isa!
Semesa: Brother, e vacava?
Cauravou: Brother, o au duaduaga i neitou vale se mateni tiko, talaidredre tiko. O noqu
Ratu sa leqa, o Nau ga sa qaravi keitou tu. Ia o au, ni suka la na job na Varaubuka, au sa
malekata tu na mai mateni i tauni. Dua na siga sa vosataki au o Nau ni oti noqu baci ceba
yani i vale na mataka ni Siga Tabu, ni keirau na veikune ga kei Jisu i toloni gaunisala au
mateni tu kina.
Sa gunuva ga mena coffee ka cuva tagitagi na cauravou oqo..
Cauravou: Isa! Ni kua saraga esa na dina kina na vosa nei Nau!
-THE END-
7
Nai Vunau:
“KO SA KACIVI MO TUKUNA NA VINAKA NI KALOU”
Lesoni: 1Pita 2: 9-15
Nai Kau
Ko ira na lotu va-Karisito taumada, me vaka e kaya ko Pita, ni ra sa ‘tabatamata digitaki,
a matabete vakaturaga, era a lako curuma edua na bula dredred ni veivakabobulataki
kei na veivakararawataki. Ko ira na tamata vakabauta e vakadeitaki vei ira me ra rokova
na matanitu kei ira era veiliutaki kina – ka sai ira sara ga oqo, era cakava tiko na i
valavala ni veivakatotogani vei ira na sa lotu baleta ni ra sa muria tiko na we ni yavai
Jisu Karisito. E sa dua dina na ka dredred me da vakaroti me da lomani ira na
dauveivakasaurarataki, ka me ra veisausaumataka na ca ena vinaka ka me ra loma
vinaka ka talaitawatawa tiko ga vei ira. 1 Korinica 4: 10-13, “ Keitou sa lialia ena vuku i
Karisito ……….keitou sa oca, ni keitou sa daucakacaka ena ligai keitou; ni keitou sa
vakasewasewani – keitou sa vosavinaka; ni keitou sa vakacacani – keitou sa vosota.”
#1
Na ka ko kilai tani kina
Eda sa tiko vulagi ena vuravura oqo baleta na noda koro me da tiko vakadua kina
e sa vakarautaka oti tu na Kalou. Me da vakaraitaka na bula e veireguci kei na nona
veikacivi
na Kalou. Ena tikina e 11-12 kei na Filipai 3:20 e kaya ko Pita ni sa sega ni
da na rawa ni vakatauvatanitaki keda ena veika vakayago ni vuravura oqo – sa tu ga
vei Karisito.
#2
Na ka ko na vakatokayacataki kina (Aisea 43: 20-21)
.
“Koi kemudou na tabatamata digitaki.” Sa kaya vei keda na Kalou ni kua, ni eda sa
Nona! E tukuna ka vakaraitaka ena yalo ni veimaroroi kei na yalo ni lomani keda
vakaidina. Eda sa sega ni vakataki ira na tawa-lotu ka sa nodrai votavota na rusa tawa
mudu, ia, eda sa tamata digitaki ni Kalou bula me da Nona. A tukuna na veika oqo ko Pita
me vakayaloqaqataki ira kina na sa Lotu, me ra vosota na veika rarawa era vakayacora
tiko na tamata tawa lotu vei ira. Na noda vakayacani e sega tale ni dua na ka ena yaco
ena gauna mai muri – e sa dua na ka eda sa rawa ni vakatokai sara ga kina e daidai keda
sa ciqomi Jisu me noda i Vakabula ka rokataka se bulataka na kenai vakarau e kilikili kei
na dua sa tamata sa Vakabauta na Kalou, ia ka sa nodai tavi talega me da wasea na
rarama eda sa raica se meda vakaveikilaitaki koya yani vei ira era se bula tiko ena
butobuto. Me vaka ga na Nona digitaki Eparama kei ira na nona kawa na Kalou me ra sa
Nona digitaki sa vakakina vei keda kece sara eda sa vakabauti Koya e daidai.
……… a matabete vakaturaga.” Na ‘vakaturaga’ e vakaraitaki ni dua nai tutu dokai, ia, na
bête e dua nai tutu dokai talega ka dauvoleka sara vua na Kalou ena vuku ni veiqaravi e
dau qarava, ena nona matataka na Kalou vei ira na lewenivanua ka vakatalega na nona
matataki ira na tamata Vua na Kalou. Na veika oqo sa vakaraitaka ko Pita, ni da sa na
vauci vakakina kevaka eda sa vakabulai mai na rusa tawa mudu, ena vuku ni noda sa
veivutunutaka na noda ca ka Vakabauta na Kalou – Lako Yani 19: 5-6a.
8
…….. a matanitu yalosavasava – a kenai balebale ni da sa mata tamata vakatabui me
Nona na Kalou, ka eda sa lewe ni Nona Matanitu. Eda sa tamata vakatikitikitaki baleta ni
sa vakavoui na yaloda kei na noda bula ka me dokai ka vakarokorokotaki ga kina na
Kalou. Sa dodonu ki vei keda me da cata nai valavala ca ka segata me da muria na we ni
yavai Jisu Karisito ( me da vei ucui kei Koya).
#3
Na ka mo na qarava ena Vukuna
Nai naki ni noda bula e laurai ena tk. 9b, “mo dou vakaraitaka kina na Nona vinaka sara
o Koya ka kacivi kemudou mai na butobuto kina Nona rarama e veivakurabuitaki.” Ni sa
yaco me da luve ni Kalou, eda sa na yaco talega me daunivakau itukutuku – eda na
tabaka, ka kacivaka na Nona loloma levu kei na Nona vinaka na Kalou. Na noda na
veivakalotutaki me da tukuna kina na veika cecere sa vakayacora vei keda na Kalou.
Nai tinitini ni Vunau
Me da rogoca tale na ka e tukuna ko Pita,“ Koi kemudou na tabatamata digitaki, a
matabete vakaturaga, a matanitu yalosavasava……..” (1 Peter 2:9).
Eda sa sega ni lewe lailai me vakataki ira na lotu taumada , ka sa sega tale ga ni da
vakabobulataki, ia, sa dodonu me lauti keda tiko na vosa nei Pita. Me rawa ni da ilovi
keda tiko kina ka me da lako doudou ena loma ni vuravura oqo ka kacivaka kina na talei
kei na Vinaka ni noda qarava na Kalou. Me da tu doudou ka yalo qaqa ena noda
vakasaqara na veigaunisala eso eda na rawa ni vakadewataki kina na Nona Vosa – a cava
ko na rawa ni vakaitavi kina? Nai tukutuku vinaka sa dodonu me dau vakariritaki na
kena kau ena vuravura ni veiveisau oqo.
Sa tiko na bolebole e matada – ko ya me da tukuna yani na Nona sa vakararamataka na
noda bula na Kalou ka meda sureta na bula e vakasaqara tiko na rarama oqo. Ena sotavi
eso na dredre ni bula ena vuku ni itavi oqo,ia, sa nodai tavi tikoga me da kilai Jisu
vajavinaka ka vakaveikilaitaki Koya yani e vuravura.
Emeni.
9
Vakamacala ni oti na drama kei Tepora
Dauveilewai Wase 4
E ra vakayacora tikotiko ga na Isireli na I valavala ca ka na tabak sobu kina na noda
bula vakayalo ka sa vakavuna kina me soli ira kina kin a liga I Japini na Tui Kenani.
Ko Tepora e dua na marama yalo qaqa ka bula voli e na noda gauna na Dauveilewai,
ka se sega na Tui, ka mai liutaki Isireli tiko. Na noda bula na lewe ni vanua e na
gauna ko ya e bula vakatabakidua ga e na kaukauwa ka ka ni veimaduataki kevaka
e na cabeti na I tutu vakaveiliutaki na marama e na noda vanua.
Na bula vakavanua vaka-Ipiriu e na dau tabaki ka raici sobu na marama e na noda I
tavi se tutu vaka-goneyalewa, se ganedua yalewa se watidua se ra tina ka me
vakararavi vakatabakidua vei ira na turaga. Na Kalou sa qai digitaki Tepora me
parofita yalewa, marama yaloqase, liuliu ka turaga ni lewa levu e na gauna vaka
oqo me vakavatukanataka ka vakadinadinataka na loloma kei na dodonu ni kalou
vei ira na tamata. E dau rokovi ka dokai ko Tepora e na nona I tutu vakaveiliutaki e
na loma I Isireli.
Ia na gauna e vakayavalati kina ko Isireli mai vua na kavetani ni valu ko Sisira na kai
Kenani, a mani kacivi ko Peraki, liuliu ni mataivalu ni Isireli, mai nei Tepora ka
vakayaloqaqataki koya ka kaya vua ni ko Jiova sa soli Sisira kin a ligana ka ni ra
liutaki koya yani ko koya. E vakadeitaka vua ko Tepora ni na vakayarayarataki
Sisira ki na uciwai ka na soli koya yani e na liga I Penaki. A sa kaya vua ko Penaki
“Kevaka ko na lako vata kei au, au na lako, ia kevaka ko na sega ni lako vata kei au,
kau na sega ni lako” (Dauveilewai 4:8). E laurai e ke ni rere ka taqaya ko Penaki ni
lako duadua kin a I valu vakavo ga ke lako vata kei koya ko Tepora.
Na Kalou e dau digitaka na tamata lako vakadodonu e na matana ka vakayacora na I
tavi se cakacaka e vinakata ko koya me vakayacori. Ka veitalia ga na duidui ni
nanuma ni tamata. Na Kalou e raica na tamata yalo taleirawarawa ka sega ena nona
I tuvaki vakayago.
E na cakacaka I Jisu e soli ka vakabibitaki rau ruarua na tagane kei na yalewa. E na
kuna na marama na I balebale vou ni bula ni tamta ni ra sega ni vakarau ga ni ka, ia,
e ra sa gaga ni cakacaka ni Kalou ak I tokani ni kena tukuni na I tukutuku vinaka.
Mo sa Tepora mai ni gauna oqo mo toso ki liu e na yalo dei kei na vakabauta e na
yalomu, ni Kalou sa tiko vata kei iko ena rara ni valu, e na vanua ni veivakaravui, e
na bula vakapolotiki kei na veika vakakina. E na vuku ni vakabauta kei na
talairawarawa ni dua na tamata sa rawa ni veisautaka na I tuvaki ni tukutuku ni
veigauna.Kevaka ko liuliu vakataki Tepora se dua e dau muri vakataki Penaki,
vakadeitaka na nomu vakabauta baleta na vakabauta e rawa ni veisautaka na I rairai
ni druka kei na qaqa.
10