La Quotidiana 11-9-2014, p. 15 GIEVGIA, ILS 11 DA SETTEMBER 2014 Viagiond cun Paul Nay 37avel Top Pop Rumantsch ■ (rtr) Il 37avel Top Pop Rumantsch ans lascha udir il chantadur Paul Nay. Il nov Top Pop Rumantsch porta il titel «Schi lunsch naven» e vegn preschentà per l’emprima giada ussa gievgia, ils 11-092014 tranter las 11:00 e las 12:00 al Radio Rumantsch. Suenter in paus turna il Top Pop dal Radio Rumantsch cun ina nova producziun. Igl è la 37avla ediziun, ed ella preschenta quasi ina corifea da la chanzun moderna rumantscha: Paul Nay, il chantautur sursilvan ch’ans ha surprais avant tschintg onns cun in album producì fitg professiunal en l’America, s’annunzia enavos cun ina nova (pitschna) perla. Igl è ina chanzun che stat spezialmain a cor al chantadur, ed il titel tradescha er pertge: «Schi lunsch naven». Paul Nay sa regorda da meds populars, citond explicit la veglia chanzun da Tumasch Dolf tenor la poesia da Schamun Mani. Ed el confrunta aposta visiuns dal passà cun il mund modern, nua che viagiar è daventà ina termagliada: «Schi lunsch naven sai oz sgular.» La melodia latiers è tipica per Nay – bufatga a l’entschatta, flurinta entamez e vairamain opulenta vers la fin. D’udir a partir da gievgia sin las undas da Radio Rumantsch. Schi lunsch naven Da pign, sco affon accumpignavas ti mei pura melanconia derasavas sur mei oz suenter tons onns ei ton semidau tia melodia vai adattau ir oz el lontan tut auter che lu oz dat miu cor auter sinzur schi lunsch naven sai oz sgular e gia damaun puspei turnar vi star quiets er vinavon ei dat egl jester, egl jester ton ei dat egl jester ton ch’ins anfla buc a casa Da tiu temps mavas ti sin viadi cun cavagl e postigliun jeu mon en quei mument oz cun aviun entuorn il mund il mund ei aschi datier oz mo tuttina aschi lontans igl jester resta jester tgei gidan eroplans schi lunsch naven sai oz sgular e gia damaun puspei turnar vi star quiets er vinavon ei dat egl jester, egl jester ton ei dat egl jester ton mo nuot mi plai sco sche savens jeu pos udir er cheu ils zenns els tunan grad sco leu tier tei els tunan grad sco cheu tier mei els tunan sco dacasa els tunan sco dacasa Top Pop Rumantsch è ina seria da producziuns da musica nova ed actuala, lantschada da RTR Radiotelevisiun Svizra Rumantscha l’onn 2005. Tut ils titels da la seria èn d’udir sin la pagina d’internet da RTR sut: www.rtr.ch/home/dossiers/actual/Top-Pop-Rumantsch.html Las emprimas 30 chanzuns èn er disponiblas sin ils disc cumpacts Top Pop Rumantsch vol. 1 & 2 ch’èn da retrair tar: RTR, Via Masans 2, 7002 Cuira. Paul Nay en acziun. ■ CHANTUN Di da las portas avertas en il center da transit a Tavau Laret (cc) En la chasa da dimora per requirentas e requirents d’asil «Landhaus» a Tavau Laret ha lieu sonda proxima, ils 13 da settember 2014 in di da las portas avertas. Dapi onns maina l’uffizi da migraziun e da dretg civil en differents lieus en il chantun alloschis collectivs per persunas dal sectur d’asil. A l’uffizi statti zunt a cor da mussar a la populaziun indigena co ch’in tal manaschi funcziuna. Perquai vegnan organisads dis da publicitad en ils centers da transit. Suenter Cazas vegn uss er manada tras ina tala occurrenza a Tavau Laret. Sonda, ils 13 da settember 2014 tranter las 11.00 e las 15.00 pon persunas interessadas bittar in’egliada en il center da transit e discurrer cun sias abitantas e ses abitants. Cun grond plaschair e bler engaschi han las requirentas ed ils requirents d’asil preparà in pèr chaussas per questa occurrenza – sper in divertiment musical or da tut il mund vegnan purschidas delicatessas tipicas da differents pajais. Las visitadras ed ils visitaders pon sa legrar d’in pitschen viadi cultural e culinaric enturn il mund. Els survegnan er ina invista dal mintgadi betg adina facil en il center da transit nua che persunas da las culturas las pli differentas vivan ensemen. MAD ■ FORUM NA alla nova lescha d’ulivaziun da finanzas Igl ei indispiteivel ch’il cantun drova ina ulivaziun da finanzas nova. Denton la refuorma previda actualmein ord il departement cantunal da finanzas e vischnauncas ei ina construcziun dil tuttafatg sbagliada. Ell’ei numnadamein nuntransparenta, cuntegn sbagls ed ei malgesta. Enstagl da sminuir las differenzas enteifer la prestaziun finanziala ed il buordi da taglia enteifer las vischnauncas schabegia il cuntrai! La categoria da vischnauncas cun in pei da taglia denter 120% e 130% posseda las pli biaras «vischnauncas perdidras». Cuntrari profiteschan fetg savens las vischnauncas cun in pei da taglia da 90% ni aunc pli bass. Aschia vegn giugau cul fiug quei ch’appartegn la so- lidaritad enteifer las vischnauncas grischunas da fermas finanzas enviers quellas pli fleivlas! Igl ei malgest ed absurd sche vischnauncas finanzialmein pli fleivlas ston alzar lur pei taglia sur 130%, far deivets ni vegnan sfurzadas da fusiunar perquei ch’ellas survegnan pli paucas contribuziuns. Dall’autra vart san denton las «vischnauncas gudignadras» ulteriuramein sbassar lur pei da taglia. Quei prighel smanatscha buca mo alla vischnaunca da Trun, mobein era ad autras vischnauncas egl entir cantun. Cun in «na» alla ulivaziun da finanzas nova stuein nus impedir quei project! Dumeni Tomaschett, vicepresident communal Trun 15
© Copyright 2024 Paperzz
